Heb 8 | TBO | STEP | U baha anona gegeka, ata tu witalaguyaba baneina e memae geka hougana Yaubada waiwasawasana anani mae gegena u awala hinebawana e tugutugula.

Hebrews 8

Wiwogatala wouna amaka i geleta

1 U baha anona gegeka, ata tu witalaguyaba baneina e memae geka hougana Yaubada waiwasawasana anani mae gegena u awala hinebawana e tugutugula. 2 Ma tauna tu witalaguyaba numa waiwoyawa dumana uyahina. Numana lawa ega hita wogoya ma Guyau tauna i wogoya.

3 Hoi hipuli tu witalaguyaba atapuhi hai bagibagi ani'mbenena apo talaguyabana Yaubada hina weleya, yaka ata tu witalaguyaba wouna tauna gasi apo ani'mbenena Yaubada ina weleya. 4 Ma tauna itapa hoi hipuli ita memae apega ita witutalaguyaba, matababana tu witalaguyaba hi maga duma ma he memae po houga magomagouna he italaguyaba, mei Mose a lugagayo i bahebaheya pite. 5 Ma hai bagibagi numa dalabu u hinena. Ma hoi hipuli numa dalabuna naka tautau hota ma numa dalabu dumana hoi yada e memae. Babana Mose numa dalabu tahatahayana i wogowogoya naka waimulina ma Yaubada Mose i paliweleya i pa, ‘Mose, una nugotuhuya numa galenana atapuna u oya a iatatiyem, atapuna una witutupoganeya po u numa dalabu una wogoya’. 6 Geka hougana Keliso a bagibagi hoi yada tu witalaguyaba hai bagibagi i gelagonihi, mei Yaubada a wogatala wouna tauta lawa mitehi, wogatala odubona i haki lagoni. Babana paliwitumagana wouna paliwitumagana odubona i haki lagoni.

7 Itapa wogatala odubona lawa atapuhi ita haguhaguhi, apega tata geno wogatala wouna uyahina. 8 Odubona Yaubada i hanapugeya mi Isalaela hai dewa ega hita dewadewa uyahinei ubeihi i pa,

‘Iyeta he nenei uyahihi wogatala wouna apo a houni
mi Isalaela po mi Yudeya ubeihi.
9 Wogatala a huhouni ega mei wogatala odubona googami a welehi
po Isipitagei a tahaehi ma hi hopu
po hi nenae hai dobu dumana uyahina.
Ma u wiwogatala a huhouni uyahina ega hita meidaodao,
yaka ega ata genogehi.’
10 Guyau i baha i pa,
‘Apo yohola u wiwogatala wouna mi Isalaela a welehi.
Ma apo u nugonugohi u lugagayo a gilumi
po hina hanapugeu tau hai Yaubada
ma tauhi u lawa.
11 Po apega hai lawa po walewalehihi hina iatatiyehi
po hina pa, “Yaubada ona hanapugeya”,
matababana atapuhi apo hina hanapugeu,
tauhi gowahi baneihi po gasi lawa yabayababa.
12 Ma hai welupowa binei a paligigilihi
po hai apapoe a winugoguluwihi.’
13 Yaubada wiwogatala wouna binei i ibaabani babana wogatala odubona i tapiya po kikina ma ina yababa.